Сәбит Мұқанов атындағы облыстық қазақ сазды-драма театрында “Дауылпаз баба – Қожаберген” қойылымы сахналанды. Спектакльде сол кездегі заман қасіреті ғана емес, Қожаберген жыраудың болмысы, ақындығы мен батырлығы, көсемдігі мен көрегенділігі, ұлтжандылығы оқиғалар желісі арқылы көрсетіледі. Қожаберген жыраудың Тәуке ханның “Жеті жарғысын” дайындауға зор үлес қосқандығы да қойылымда үйлесімді көрініс тапқан.
Біздің мектебіміздің оқушылары қойылымды тамашалауға барған болатын. Тарихи дастанды спектакль тіліне үйлестіріп, көрермендерге ой салған актерлердің де шеберлігіне оқушылар тәнті болды. Ұлттық құндылықтарды дәріптейтін осындай қойылымдар жастардың бойында патриоттық рух қалыптастырады.
