Тәуелсіздік бізге аспаннан түскен олжа емес. Тәуелсіздік – киелі де қасиетті сөз. Оның мағынасы да терең. Ұлы дала төсі талай тарихи оқиғаларға куә болды. Жерімізді жат қолына бермей, тәуелсіздік жолында күресіп өткен, туған жері мен халқының қамы үшін жүрек жұтқан Қабанбай мен Бөгенбайды, Ағынтай мен Қарасайды, Исатай мен Махамбетті, Кенесары мен Абылайды, ел бірлігі мен тұтастығын ту еткен, қазақ ұлтының мәңгілік ел болуының алтын діңгегін қағып, идеологиясын жасап кеткен Керей мен Жәнібекті, олардан тараған текті ұрпақты, «Қасым ханның қасқа жолын», «Есім ханның ескі жолы» мен әз-Тәукенің «Жеті Жарғысын», Әйтеке, Қазыбек, Төле биді бүгінгі ұрпақ ұмытпауы тиіс. Тәуелсіздігімізді анамыздай ардақтап, ұлттық құндылықтарымызды көздің ағы мен қарасындай қастерлеп, қадіріне жете білейік! Сонда ғана Азаттықтың ақ туы көк аспанымызда Мәңгілік желбірейді! Ылайым, еліміз тыныштық бесігінде тербеліп, бейбітшіліктің ақ құсы көкте самғай берсін! Қасиетті мереке құтты болсын!